Հասարակական առողջության և շրջակա միջավայրի ազգային ինստիտուտի գիտնականների կողմից իրականացվել են հետազոտություններ, որոնց մասնակցել է 65-ից մինչև 84 տարեկան, խրոնիկ հիվանդություններից զուրկ 470 տղամարդ:

Հետազոտությունները մեկնարկել են 1985 թվականին և ընթացել 15 տարի: Առաջին և հետագա այցերի ժամանակ` 5 տարին մեկ անգամ, տղամարդիկ պատասխանել են իրենց սննդակարգին վերաբերող հարցերին, մասնավորպես` կակաո պարունակող սննդամթերք օգտագործելու հաճախականության մասին:

Հոլանդացի գիտնականները հայտնաբերել են, որ տղամարդիկ ամեն օր օգտագործել են գրեթե 2.11 գ կակաո: Մասնակիցների 1/3-ը հետազոտությունները սկսելուց առաջ ընդհանրապես կակաո չէր օգտագործում:

Հետազոտությունների արդյունքները ցույց են տվել, որ այն տղամարդկանց մոտ, ովքեր կանոնավոր օգտագործում էին կակաո պարունակող սննդամթերքներ, զարկերակային ճնշումը ցածր էր` ի տարբերություն այն տղամարդկանց, ովքեր այդպիսի սնունդ կամ խմիչք չէին օգտագործում: Հետազոտությունների ընթացքում մահացել էր 314 տղամարդ, որոնցից 152-ը` սրտանոթային հիվանդություններից:

Պարզվել է, որ այն տղամարդիկ, ովքեր առավել հաճախ են օգտագործում կակաո պարունակող սննդամթերքներ, 2 անգամ ավելի քիչ են մահանում սրտանոթային հիվանդություններից, քան նրանք, ովքեր խուսափում են կակաո պարունակող սննդից:

Ռիսկի գնահատումն իրականացվում էր` հաշվի առնելով այնպիսի գործոններ, ինչպիսիք են քաշը, ծխելը, ֆիզիկական ակտիվության մակարդակը, սննդակարգի կալորիականությունը և ալկոհոլի օգտագործման մակարդակը:

Ըստ հոլանդացի գիտնականների` սրտի և անոթների համար առավել կաևոր են կակոյի մեջ առկա յուղը և հակաօքսիդանտները: Հակաօքսիդանտները պաշտպանում են հյուսվածքները վնասվելուց, ինչը պայմանավորված է բարձր ակտիվություն ունեցող միացությունների` ազատ ռադիկալների ազդեցությամբ:

Չնայած առկա եզրահանգումներին, շատ գիտնականներ կարծում են, որ դա շոկոլադի ազդեցությունն է: "Չոր վիճակում և մեծ չափաբաժնով օգտագործվող կակաոն դժվար է մարսվում օրգանիզմի կողմից: Որպեսզի այն որևէ օգուտ տա, պետք է օրեկան ուտել 100 գ սև շոկոլադ",- հայտարարել է Կետի Ռոսը սրտային հիվանդությունների դեմ պայքարի բրիտանական ֆոնդից: "Դա կնշանակի մոտ 500 կալորիայի և 30% ճարպի օգտագործում, ինչը պարունակվում է 100 գ շոկոլադի մեջ":

"Մենք իհարկե մարդկանց չենք առաջարկում հրաժարվել շոկոլադից: Ցանկացած մարդ կարող է ժամանակ առ ժամանակ վայելել դրա համը: Սակայն կան սիրտը լավացնելու ավելի լավ ճանապարհներ",- հայտարարեց Ռոսը: